15/05/2026
Wie is Snyman’s Bakkery & R59 Padstal?
Ek is Tanya Snyman, en drie jaar gelede het ek die droom begin uitleef om my eie padstal te besit — net soos my ouers, Mackie en Rina MacDonald van Tzaneen, wat die bekende MacDonalds Padstal bedryf het waarin ek grootgeword het. Van kleins af het ek die liefde vir mense, tuisgebakte produkte en die unieke atmosfeer van ’n padstal leer ken.
My passie vir bak het egter baie vroeër begin. Meer as 15 jaar gelede het ek my eie bakkery begin en beskuit begin bak. Met verloop van tyd het dié klein begin ontwikkel in iets baie groter as wat ek ooit kon droom.
By Snyman’s Bakkery & R59 Padstal het ons die geleentheid gekry om voortdurend uit te brei en nuwe dinge aan te pak. Vandag bied ons heerlike tuisgemaakte produkte, varsgebakte pasteie, bevrore etes en ons eie vleisprodukte aan — alles met dieselfde huislike gehalte en liefde waarmee ons begin het.
Met die groei van die padstal het ons ook ons restaurant uitgebrei en ’n venue geskep vir privaat funksies en spesiale geleenthede. Hier glo ons dat niks onmoontlik is wanneer jy met passie en harde werk aan jou droom bou nie.
Snyman’s Bakkery & R59 Padstal is meer as net ’n besigheid — dit is ’n plek waar familie, goeie kos en gasvryheid bymekaarkom. Ons nooi elkeen uit om deel te word van ons storie en self te kom beleef waaraan ons met trots bou.
’n Spesiale dankie ook aan my man, Reyno Snyman, wat hierdie planne en drome vir my moontlik gemaak het. Sonder sy ondersteuning, harde werk en geloof sou dit nie moontlik gewees het nie.
Ons hoop om jou binnekort hier by die padstal in Viljoenskroon te verwelkom. 💛
Groete
Tanya Snyman
