VLU Platrand Tambukistreek Mpumalanga

11/08/2026

Dit was ‘n koel wintersoggend toe taklede opdaag by Platrand se Boeresaal vir hul maandelikse vergadering. Dit was ‘n baie spesiale oggend want die tak is twee lede ryker, Maureen Wentworth en Zoe Louw. Maureen is woonagtig in Standerton en Zoe bly in die omgewing van Platrand.
Gasvroue vir die oggend was Stephanie Schutte, Petro Jooste en Chantelle Jooste. Natuurlik het lede die eetgoed terdee geniet en daar was ‘n vrolike atmosfeer. Almal het heerlik saam gekuier oor 'n koppie koffie.
Lede het Lemoentoffies inhandig vir beoordeling. Daar was slegs twee inskrywings en daar sal weer ‘n kans wees met die volgende vergadering om in te skryf. Albei die inskrywings gaan deur na konferensie. Dames wat ingeskryf het was Carien Schabort en Stephanie Schutte.
Stephanie het lede verras met ‘n baie oulike demonstrasie oor hoe om "Caviar" te maak met gelatien, lemoensap en koue olie. Dit was baie interessant en die eindproduk was baie mooi vir garnering en ook smaaklik. Dis ‘n eenvoudige resep en lede gaan dit definitief probeer in die toekoms.
Platrand is volgende jaar 60 jaar oud en vir die geleentheid het die tak geel mieliemeel in lapsakkies laat maak. Dit word verkoop teen R60.00.
Mieliemeelverkope vaar goed sover en gelde sal gaan om die tak se fondse te versterk.
Tydens die vergadering is daar vinnig gesels oor die opkomende kongres en sake soos die verkiesing en beskrywingspunte was deeglik bespreek. Dit was ‘n lekker, vol oggend en lede het huis toe gegaan met ‘n lied in die hart.

09/08/2026

Platrand Vroue wat Saamstaan.

Wanneer vroue saamwerk, gebeur iets besonders. Ons staan nie teenoor mekaar nie, maar langs mekaar. Ons ondersteun, bemoedig en dra mekaar deur die mooi én moeilike tye.
Elke vrou is uniek – met haar eie talente, drome, persoonlikheid en storie. Ons hoef nie dieselfde te wees om saam te groei nie. Inteendeel, dit is juis ons verskille wat ons sterker maak.
Kom ons vier mekaar se uniekheid, gun mekaar ruimte om te blom en wees altyd bereid om ’n hand uit te steek. Want wanneer vroue mekaar ondersteun en saamstaan, kan ons ongelooflike dinge bereik.
Saam is ons sterker. Saam inspireer ons. Saam maak ons ’n verskil.

28/07/2026

17/07/2026

Die Hoëveldkoue het gebyt Dinsdagoggend, 7 Julie 2026, terwyl lede van Platrandtak aankom by die vergadering. Die program was vol en gasvroue, Carien Schabort, Suretha Kruidenier en Marisca Vosloo het die lede verras met heerlike groentesop en broodrolletjies om die dag mee te begin. Daar was ook koffie en lekker koeksisters vir 'n soetigheid.

Carien het vir lede demonstreer hoe om tuisgemaakte Griekse jogurt te maak. Daar is 'n paar stappe verbonde en so was dit eerste op die agenda.
Sy het die jogurtproses aan lede verduidelik en lede is ingelig hoe hierdie manier van Griekse jogurt maak baie koste effektief is. Verder deel sy ook 'n paar nuttige ideas vir ander jogurt southappies. Carien dra die 100 jaar viering voorskoot.

Petro Jooste bespreek die belangrike punte op die agenda rakende die kongres en die opkomende Kuier, klets en werkdag.
Marlie Geldenhuys sluit amptelik as lid van Platrandtak aan en ons hoop sy voel welkom by ons tak.

Lede moes ook hul Lemoensmeer en Mini Lemoenkaaskoeke inhandig vir beoordeling. Deelname aan albei gebak en gebottel was goed, ses flesse lemoensmeer en vyf mini kaaskoeke. By die Lemoensmeer het Stephanie Schutte, Carien Schabort en Adri Louw deurgedring en by die mini kaaskoeke het Stephanie Schutte, Carien Schabort en Lena du Plessis deurgedring na konferensie 2027.

Dit was 'n heerlike verrykende takvergadering en almal kon ook proe aan al die gebak en gebottel.

22/06/2026

Damesoggend 1 Augustus 2026
Bespreek by
Carien 083 928 2121
Susan 082 771 1408

18/06/2026

Platrandtak se lede was opgewonde om Juniemaand se vergadering te begin.
Ons verwelkom 'n nuwe lid Marlie Geldenhuys van Platrand omgewing.

Gasvroue vir die oggend was Alna Kapp, Joan Blignault, Adri Louw, Hannetjie du Preez en Lena du Plessis. Natuurlik was lede bederf met heerlike terte en ander eetgoed. Baie dankie dames, ons het heerlik gesmul.

Petro Josste, die takvoorsitster het vinnig die agenda deurgegaan en die kongres registrasie is ook bespreek.

Maryna van Emmenes, Takvoorsitster van Vaalriviertak in Hoëveldstreek het lede meer kom vertel oor die Stik en Sny metode vir 2027 se SAVLU kompetisieartikel.
Maryna het lede van die 3 verskillende metodes van stik en sny vertel; daar is die
Stik en sny metode (Stich & slash) die Chenille tegniek en die keersy appliek tegniek. Daar was voorbeelde van elke tegniek en lede kom deeglik na die tegnieke kyk en vrae vra. Dit was baie insiggewend en dames weet nou watter tegniek om vir hul artikel te gebruik en watter gereedskap om te gebruik.

29/05/2026

VLU Platrand se dames het hul takvergadering in Mei gehou op 'n vrolike sonskyn wintersoggend.
Die Gasvrou was Petro Jooste, Chantelle Jooste en Stephanie Schutte.
Lede kon heerlik smul aan al die versnapperinge - en glo my daar was genoeg om aan te peusel!
Daar was 'n demonstrasie van die streekartikel - Decoupage windklokke blikkies. Dames het gesels oor watter tipe kwasse die beste sal werk asook hoe om blasies onder die servet te vermy. Die blikkie se oopsny en voorbereiding is baie belangrik. Lede moes elkeen hul 'versameling' servette saambring vir uitruil onder mekaar. Daar was baie om van te kies.
Almal was baie dankbaar dat Adri Louw die vergadering kon bywoon en haar voet so herstel het na 'n perd daarop getrap het.
Carien Schabort wat die beoordelaars opskerping die vorige week bygewoon het, het aan lede belangrike inligting rondom van die SAVLU kompetisie artikels gegee.