18/10/2016
ALGERYNSKRAAL – Die Padstal
Die Padstal is onder nuwe bestuur. Jan Kritzinger is nou self verantwoordelik vir die oorhoofse bestuur van die Padstal. Rika de Lange bestuur dit op ‘n dag-tot-dag basis en maak seker dat ons die beste maaltye, op die beste manier, in die Klein Karoo kry. Beide praat met lof oor wat Arrie-hulle tot stand gebring het, en wil daarop voortbou.
Jan beoog egter om ‘n paar nuwe dingetjies te doen, soos byvoorbeeld
* ‘n groter en beter speelpark vir kinders wat ook plaas- en ander diersoorte gaan insluit
* spesiale funksies en etes vir ou mense in die omgewing
* verbeterde konferensie fasiliteite
* hantering van toergroepe wat in busse opdaag.
Hy wil veral hê Die Padstal moet meer mense by spesiale geleenthede soos Moedersdag en Kersfees kan akkommodeer. Dinge wat reeds verander het is die uitgebreide spyskaart wat ‘n klompie nuwe items insluit. Etes neem nou die vorm van ‘n buffet aan wat dit makliker vir jou maak om op die dinge waarvan jy die meeste hou te konsentreer. Een van die nuwe gebeure is die Boerbok en Slagvee veiling wat deur GWK op 24 November 2016 daar gehou gaan word.
