15/08/2026
44 KATAO, PATAY HUMAN MAUNLOD ANG OVERLOADED FERRY SA ZIMBABWE
44 ka tawo ang namatay human naunlod ang usa ka overloaded ferry sa Lake Kariba sa Zimbabwe.
Base sa report sa Civil Protection Unit, adunay 114 ka adult passengers, lima ka crew member ug wala pa matino nga gidaghanon sa mga bata ang sakay sa ferry sa dihang nahitabo ang insidente.
Ang ferry adunay kapasidad lamang nga 90 ka pasahero.
Sa unang report, 77 ka tawo ang naluwas ug 15 ka mga patay ang narekober. Apan sa katapusang report gibutyag sa Zimbabwe Republic Police nga misaka ngadto sa 44 ang death toll samtang nagpadayon ang search and rescue operation alang sa mga pasaherong wala pa makita.
Sumala sa usa ka saksi, mipadayon gihapon sa pagbiyahe ang ferry bisan pa sa dili maayong panahon.
Gituohang gihapak kini sa kusog nga mga balod nga posibleng maoy hinungdan nga nawad-an og balanse ang ferry nga maoy hinungdan sa pagka unlod.
Dali usab nga miresponde ang mga kasikbit nga sakayan aron motabang sa rescue operation. Mitabang usab ang mga diver, dagkong mga barko, militar ug helicopter sa pagpangita ug pagluwas sa mga pasahero.
Ang mga naluwas nga pasahero gidala ngadto sa Long Island, nga nahimutang sa tunga-tunga sa Lake Kariba.
Samtang, duha ka funeral parlor ang gimandoan sa pagkolekta sa mga narekober nga mga patay.
Ang Lake Kariba nahimutang sa utlanan sa Zimbabwe ug Zambia ug giila isip usa sa pinakadakong artificial lake sa kalibotan. Via | Gerry Lou Yakan.
