Eple frå Steinsletto

29/09/2022

Hei! Her kjem ei lita oppdatering på eplehausten 2022. I år har vi vore ute for Rognebærmøllen igjen. De hugsar gjerne at vi hadde eit stort åtak også i 2020. I år er det like gale, noko som medfører at vi mistar heile avlinga med tanke på salg.

Vi hadde håp om ein ekstra god sesong i år, då dette også vert siste året vi driftar for eplesalg hjå oss. Dessverre vart det ikkje slik.
Vi er komne til den konklusjonen at vi ynskjer og har behov for å prioritere små ungar og familie i tida framover. Vi ynskjer å takke så mykje for åra med kjøp av eple hjå oss. Det har vore mange kjekke møte med mange flotte folk!

Beste helsing, Bjørnar og Karoline G. Eik.

19/09/2021

Me har framleis litt Discovery og Prins att i hyllene. Om du skulle få lyst til å bake kake, eller rett og slett manglar eple til nista, er det berre å ta turen oppom på Steinsletto så ordnar det seg 🍎

18/09/2021

I dag, laurdag, står me ved Grano i Uskedalen og sel Discovery og Prins.

Vert ståande fram til ca. Kl. 14.00.

160,- for fyrste sortering
130,- for andre sortering

05/09/2021

Haustinga er så smått i gong her hjå oss. Discovery er fyrste sort ut (eller inn på lager, i alle fall i fyrste omgang), og frukta ser særs bra ut. Desse mognar i litt ulikt tempo i år, og det ser dermed ut til at det vert hausting av resterande tre nærmare neste helg.
Deretter set me i gong med sortering og levering, og hausten er utvilsamt i gong 😊

24/08/2021

Hausten er her!

Sanneleg er sumaren på hell, og den travlaste og kjekkaste tida på året nærmar seg.

Det ser svært lovande ut for eplehausten i år. Det er mykje flotte eple på trea.
Me er i gong med å teste dei tidlegaste sortane me har for salg, og konstaterer at det snart nærmar seg hausting.

Discovery og Prins vert etter alt å døme klare for hausting i løpet av neste veke.

Me set i gong med sortering så snart me har fått desse på lager, og leverer i fyrste omgong til dei som står på fast bestilling, men tek sjølvsagt imot tinging av eple, og sel så lenge me har eple å sortere.

27/05/2021

Gode eplevener! Den flottaste tida på året er her endeleg. Førre år hadde vi, som de gjerne hugsar, ein svært dårleg sesong med lita avling og eit voldsomt åtak av rognebærmøll. Etter bløminga å dømme ser det lovande ut for årets sesong, og vi kryssar det meste for at det vert ein fruktbar haust.

Vi håpar det går vegen, og gledar oss til å sjå dykk att 🙂

09/10/2020

Hadde ein framifrå dag på garden her på tysdag med besøk av dyktige eplepressarar, og bladfyken. 🍎

Tysdag inviterte Besøkssenter Folgefonna Nasjonalpark til eplepressing i Uskedalen.

30/08/2020

Eplehausten 2020 er i gong, men det ser ikkje ut til å bli fruktbart. Det har vore særs lite rognebær i år, noko som resulterer i at rognebærmøllen går til åtak på epla. Då vi ikkje sprøyter med gift mot insekt her på garden har dette gått veldig ut over epla her hjå oss. Såpass mykje at vi nok ikkje vert i stand til å ta i mot bestilling utanom dei av kundane våre som allereie har bestilt, og kan hende har vi ikkje nok til desse ein gong.

Såleis føyer eplehausten 2020 seg inn i rekka av negative hendingar som har prega året elles så langt. Vi vonar neste år vert eit fruktbart år, og vil kome attende med informasjon angåande avlinga i år, og om det eventuelt vil verte mogleg å ta i mot fleire bestillingar når vi er byrja å sortere.

Elles vil vi få ynskje dykk alle ein fin haust, og vonar de har det bra!

05/04/2020

Humlene er på jobb 🙂

21/03/2020

Her på bruket prisar me oss lukkelege for å ha hage å stelle i i desse dagar. Me er godt i gong med klypping av tre, og ser stadig meir til sola. Vonar alle har det fint, og har fått nytt vêret dei siste dagane. No ser me fram mot bløming og fridom 🍎

28/11/2019

Vi har framleis ein del aroma att på lager, og fyller opp salsstativet kontinuerleg.

Er du luren på om du skal sikre deg ein kasse til jul er dette tida å gjera det på 👍
Aroma-epla held seg til godt ut på nyåret 🍎