Dialekvereiniging Veldeke Venlo

15/06/2026

21/04/2026

𝗩𝗲𝗿𝘀𝗷𝗹𝗮𝗮𝗴 𝘃𝗮𝗻 𝗱𝗲 𝗳𝗶𝗻𝗮𝗹𝗲 𝗮𝗼𝘃𝗲𝗻𝗱 𝘃𝗮𝗻 𝗱𝗲 𝟮𝟱𝗲 𝗧𝗲𝗴𝗲𝗹𝘀𝗲 𝗱𝗲𝗰𝗹𝗮𝗺𝗮𝘁𝗶𝗲𝘄𝗲𝗱𝘀𝗷𝘁𝗿𝗶𝗲𝗱 𝘃𝗮𝗻 𝗩𝗲𝗹𝗱𝗲𝗸𝗲 𝗯𝗲𝗲𝗷 𝗱𝗲 𝗛𝗮𝗿𝗺𝗼𝗻𝗶𝗲𝘇𝗮𝗮𝗹 𝗶𝗻 𝗧𝗲𝗴𝗲𝗹𝗲.

Van Sjlôknaze toet Knoterbôkse en van hundjes toet de gym-les. En ouch 'n potje game en de kermis kwaam vurbeej. Vur 't publiek, de jury en de organisatie waas 't óetzich oppe buun 't perfecte plaetje. Kleine druupkes van 'ne voes hoëg, bijna sjoël-verlaoters en alles wat dao tössenin zit, wisten 't publiek in te pakke. Dao óet bleek maar wir: Tegele haet versjrikkelik vuël talent.

D'n hiër Gerard Derkx óet 't besjteur van Veldeke Venlo äopende d'n aovend. Hae zat werkgroeplid Truus Verbong in de sjienwerpers. En det is gans terech, want Truus zet zich al 25 jaor in vur 't behaad van 't Tegels dialek beej basissjoël-kinger. De presentatie van d'n aovend loog in heng van Stijn Clabbers, dae leet zeen det ömgaon met kinger en oppe buun sjtaon vur ö-m gesjneje kook is. Al gauw goof Stijn de microfoon euver aan Gijs Broekman, dae as klein men-ke meideej met de declamatiewedsjtriéd en ouch op ôzze banner sjteit. Ter iere van 't jubileumjaor leet Gijs zien versje van vruger nag ens huëre. Vervolges sjloot hae aan as jurylid, same met Annelies Holtman en Mirjam Sniers.
Achtiën kinger lete ôs geniete, lache of juus sjtil waere. Idder op eur eige meneer. Wie de jury in beraad ging, meugde weej efkes alle sjpanning van ôs aafdanse, same met 'ne swingende dansgroep van V.G. D'n Oeles.

𝗗𝗲 𝗷𝘂𝗿𝘆 𝗺𝗮𝗸𝗱𝗲 𝗱𝗲 𝘃𝗼𝗹𝗴𝗲𝗻𝗱𝗲 𝗼𝗲𝘁𝘀𝗷𝗹𝗮𝗮𝗴 𝗯𝗲𝗸𝗲𝗻𝗱:

𝗢𝗻𝗴𝗲𝗿𝗯𝗼𝘂𝘄
1e Raf Heuts met Sjlôknaas van Mariska Reer
2e Louá Spee met Vlok van Leonie van Hulten
3e Lois Haenen met Sjlôknaas van Mariska Reer
𝗠𝗶𝗱𝗱𝗲𝗯𝗼𝘂𝘄
1e Babette Ewals met Perfecte plaetjes van Susan Janssen
2e Djemke Schouwenberg met Gymles van Iris Vercoulen
3e Pim Litjens met Kermis van Iris Vercoulen
𝗕𝗮𝗼𝘃𝗲𝗯𝗼𝘂𝘄
1e Lucy van de Ven met De roëze van meneer Knoterbôks van Herman Bors
2e Siem Stapel met In ein potje van Hanneke van der Sommen
3e Saar Broekman met De roëze van meneer Knoterbôks van Herman Bors

De nummers 1 en 2 zeen weej truuk beej de Limburgse finale op 6 juni in Wiërt. (Info dao euver volg)

Fotograaf Jos Verbong haet alles wir sjoën vasgelag. Op Facebook en binnenkort ouch op de website https://veldekevenlo.nl kent geej de foto's bekiéke.

Ter iere van 't 25-jäorig jubileum haet de Tegelse werkgroep zelf 'n Tegels-Nederlands
memorysjpel gemak, zoëdet idderein toet in lingte van jaore ken bliéve sjpeule met taal. Dit sjpel is óetgereik aan de winnaers, de sjriévers - aan wae weej jaorliks die sjoëne gedichte te danke hebbe - en geit ouch nao de sjoële.

Weej danke idderein vur de belangsjtelling en inzet.

Toet volgend jaor op 16 april 2027 in de Harmoniezaal!

Werkgroep Tegelse declamatiewedsjtriéd Veldeke,
Truus Verbong
Nicol Ebus
Susan Janssen

15/04/2026

in memoriam

*Wiel van Aarssen*

Aafgeloupe zondaag is d’n hier Wiel van Aarssen in de laeftied van 84 jaor euverleje.
Op 27 april aanstaonde zoel hae 85 jaor zien gewaore.

Wiel is eine bekinde Venlonaer.
Hae waas aktief binne vuuel Venlose vereiniginge.
Hae waas ein van de ierste leje van Vastelaovesvereinging “de Wien” in de buurt “Maagdenberg”.
Ouk waas hae ein van de oprichters van de handbalvereining L’oreal.
Beej dees vereiniging haet hae vuuel funksies vervölt: Veurzitter, sikkertaris, kantinebeheerder, etc.

Hae waas ein van de organisatore van ’t bekinde “Maasland”-veldhandbaltoernooi.
Det woort jaorelang gehalde op ’t sportpark “Herungerberg” in Venlo.

‘t In Venlo bekinde handbaltoernooi veur de lieëgere en hoeëgere schoeële waas aan zien brein óntspraote.
De sporthal aan de Craneveldstraot zoot dan weer gans vol.

Wiel waas ouk eine tied lid van ’t besteur van ’t Nederlands Handbal Verbond, aafdeiling Limburg.

Ouk as scheidsrechter stónd hae zien menke.
Hae handbalde op latere laeftied nog beej de veterane van zien L’oreal.

Maar de letste jaore waas hae ein van de kertrekkers van Dialekvereiniging Veldeke Venlo.
Vuuel eveneminte van dees vereiniging hit hae mei georganiseerd.
D**k aan “de slumste Venlonaer”, de fietstochte van dees vereiniging, de “kers-inn” in de kepel van de paters Trappisten (Ulingsheide) en nog vuuel mier.

Venlo is vuuel dank aan Wiel verschöldig veur zienen inzet veur alle zake die hae haet opgepak.

Wiel, rös zaag.
Weej zegge dich dank veur al dien werk, tied en meujte.

Weej winse zien Ria, zien dochters Yvonne en Moniek, de partners en de kleinkinder vuuel sterkte met dit enorme verlees.

26/01/2026

De letste maonde van 2025 hebbe zeej in de beuk gezaete, geluusterd, geschreve, foute gemak en gelierd. 📖👨🏼‍🏫📝💼
Vanaovend mochte zeej eur diploma in óntvangs neme oet hand van eure lieraar Bas Vissers
Venlo haet weer ein aantal minse d’r beej die ós moderstaal ein werm hert toedrage en weite wie det ‘t geschreve wuurt💙❤️
Deilnemers bedank veur óg enthousiaste deilname en blief Venloos schrieve!! 👊🏻🍀