19/08/2024
#ဝါခေါင်လပြည့်_မေတ္တာအခါတော်နေ့အကြောင်း
_______________________________
ဗုဒ္ဓဒေသနာအရ ဝါခေါင်လပြည့်နေ့ကို
“မေတ္တာအခါတော်နေ့”လို့ သတ်မှတ်ခဲ့ကြတယ်၊
ဘုရားရှင် သက်တော်ထင်ရှားရှိစဉ်က
ရဟန်းငါးရာတို့သည် သာဝတ္ထိမြို့တော်နှင့်
ယုဇနာတစ်ရာဝေးကွာသော တောအုပ်တစ်ခု၌ ဝါကပ်ကာ ရဟန်းတရားအားထုတ်ကြ၏။
တောအုပ်၌နေသော ရုက္ခစိုးနတ်တို့သည်
ရဟန်းတော်တို့၏ သီလတန်ခိုးကြောင့်
သစ်ပင်ထက်၌ မနေနိုင်ဘဲ ကလေးတွေ
လက်ဆွဲကာ မြေအောက်သို့ ဆင်းကြရ၏။
ရုက္ခစိုးနတ်တွေလည်း ကြာလာတော့
သည်းမခံနိုင်တော့သဖြင့် ရဟန်းတော်များ
ထွက်သွားအောင် ခြောက်လှန့် မကောင်းတဲ့
အနံ့တွေလွှင့်ကြသောကြောင့် ရဟန်းတော်များ
ဆယ့်ငါးရက်ခန့်နေပြီး ဘုရားရှင်ထံ ပြန်ကြကာ
အကျိုးအကြောင်း လျှောက်ထားကြသည်။
ထိုအခါ ဘုရားရှင်က
“ချစ်သားတို့က လက်နက်မှ ယူမသွားကြပဲကိုး။
ငါဘုရားလက်နက်ပေးလိုက်မယ်။
ဒီလက်နက်ဟာ ချစ်သားတို့အတွက်
ပရိတ်(အရံအတား) လည်း
ဖြစ်လိမ့်မယ်။ကမ္မဋ္ဌာန်းလည်း ဖြစ်လိမ့်မယ်။”
ဟု မိန့်ကာ မေတ္တာပွားနည်း"မေတ္တသုတ်"ကို
သင်ပြဟောကြားပေးလိုက်၏။
ထိုမေတ္တသုတ် ဟောကြားပေးသောနေ့သည်
ဝါခေါင်လပြည့်နေ့ဖြစ်၍ ဝါခေါင်လပြည့်နေ့ကို
“မေတ္တာအခါတော်နေ့”ဟု သတ်မှတ်ထားကြ၏။
ရဟန်းတော်ငါးရာလည်း ထိုတောအုပ်သို့
ပြန်သွားကာ မေတ္တသုတ်ကို ရွတ်ဖတ်ပွားများ၍
အားလုံးအဆင်ပြေသွားကြသည်။
နောက်ဆုံးတော့ ရဟန္တာ ဖြစ်သွားကြ၏။
မေတ္တာဟူသည် သူတစ်ပါးတို့၏ ကောင်းကျိုး
စီးပွားကို လိုလားသော သဘောရှိ၏၊
သူတစ်ပါးတို့၏ ကောင်းကျိုးစီးပွားကို
လိုလိုလားလား ဆောင်ရွက်ပေး၏။
အငြှိုးအာဃာတကို ပယ်ဖျောက်တတ်၏။
သူတစ်ပါးတို့ ပြည့်စုံချမ်းသာမှုကို ဦးတည်၏။
မေတ္တာသဘောကို အဘိဓမ္မာက ဤသို့ဆို၏။
သူတစ်ပါးကောင်းကျိုးကို လိုလားတာ မေတ္တာ။
သူတစ်ပါးကောင်းကျိုးရှိအောင် ဆောင်ရွက်ပေးတာ မေတ္တာဖြစ်သည်။
တစ်ဖက်သားကို ချမ်းသာစေချင်တာ မေတ္တာဖြစ်သကဲ့သို့ တစ်ဖက်သားကို ဒုက္ခ မရောက်စေချင်တာလည်း မေတ္တာပင်ဖြစ်၏။
ထို့ကြောင့် ဘုရားရှင်က
“လူအချင်းချင်း လှည့်စားခြင်း၊ ကင်းရှင်းကြပါစေ။
လူအချင်းချင်း အထင်သေးခြင်း ကင်းရှင်းကြပါစေ။
လူအချင်းချင်း နှိပ်စက်ခြင်း ကင်းရှင်းကြပါစေ”
ဟု မေတ္တာပို့ရန် မိန့်ကြားတော်မူသည်။
ထို့ကြောင့် ဘုရားရှင်က လူသားအချင်းချင်း
လိမ်ညာခြင်း လှည့်စားခြင်းကင်းဖို့၊ မထီမဲ့မြင်ပြုမှု အထင်သေးမှုတွေ ကင်းဖို့၊ သီးသန့် မေတ္တာပို့ရန်
အထူးမိန့်ကြားခဲ့လေသည်။
ဘုရားရှင်ကိုယ်တော်မြတ်သည်
သူ့ကိုဆန့်ကျင်သော
မာရ်နတ်၊ အာဠဝကဘီလူး၊ နာဠာဂီရိဆင်၊
အင်္ဂုလိမာလ၊ စိဉ္ဇမာဏ၊ သစ္စကပရဗိုဇ်၊ နန္ဒောပနန္ဒနဂါး၊ ဗကဗြဟ္မာတို့ကို အနိုင်ယူအောင်မြင်တော်မူခဲ့၏။ ထိုအောင်ခြင်းရှစ်ပါးကို အောင်မြင်ရာတွင်
အကြမ်းမဖက် မေတ္တာသက်သက်ဖြင့် အောင်မြင်တော်မူခဲ့ခြင်း ဖြစ်၏။
ထို့ကြောင့် မိမိတို့ ရည်မှန်းချက်တစ်ခုခု
အောင်မြင်ချင်လျှင် မေတ္တာသာထားပါ။
မေတ္တာသာ ပွားပါ။ မေတ္တာနှင့်သာ ဆောင်ရွက်ပါ။
တကယ်စစ်မှန်သော အောင်မြင်မှုကို ရရှိမည်
ဖြစ်ပေသည်။
#အရှင်သံဝရာလင်္ကာရ_ဓမ္မပိယဆရာတော်
#ဝါခေါင်လပြည့်_မေတ္တာအခါတော်နေ့
#ဓမ္မစာစုများ
__________
Crd🙏
