26/09/2023
လမုန့်ပွဲတော်ဖြစ်ပေါ်လာပုံနှင့် ရိုးရာယဉ်ကျေးမှု
လာမဲ့ စက်တင်ဘာ ၂၉ ရက်နေ့ဆို လမုန့်ပွဲတော်နေ့ရောက်ပြီနော်။ တရုတ်နိုင်ငံဟာလည်း မြန်မာနိုင်ငံလိုပဲ့ ပွဲတော်အင်မတန်များတဲ့ နိုင်ငံတခုပါ။ ပွဲတော်တွေအများကြီးထဲမှာမှ တရုတ်ရိုးရာပွဲတော်ကြီး ၄ ပွဲ ဆိုပြီးရှိပါတယ်။တရုတ်နှစ်ကူးပွဲတော်၊ သချိုင်းကန်တော့ပွဲ၊ နဂါးလှေလှော်ပြိုင်ပွဲ နှင့် လမုန့်ပွဲတော်(ဆောင်းဦးလယ်ပွဲတော်)တို့ပဲ့ဖြစ်ပါတယ်။ တရုတ်လ ၇,၈,၉ ကဆောင်းဦးရာသီကာလပါ။ လမုန့်ပွဲတော်ကို ဆောင်းဦးရာသီရဲ့ အလယ်တည့်တည့်ဖြစ်တဲ့ တရုတ်လ ၈ လပိုင်း ၁၅ ရက်နေ့မှာကျင်းပပါတယ်။အဲတာကြောင့် ဆောင်းဦးလယ်ပွဲတော်ဆိုပြီး အမည်ခေါ်ကြပါတယ်။ အဲနေ့ရဲ့လ က တစ်နှစ်လုံးမှာ ကမ္ဘာမြေနဲ့အနီးကပ်ဆုံးအကွာအဝေးမှာရှိတယ် လို့ပြောကြပါတယ်။
လမုန့်ပွဲတော်ဖြစ်ပေါ်လာပုံကတော့ ဟိုးရှေးရှေးတုန်းက ကမ္ဘာမြေပေါ်မှာရုတ်တရက်ကြီး နေ ၁၀ စင်း ထွက်ပေါ်လာသတဲ့။ ရာသီဥတုလွန်စွာပူပြင်း၊ရေတွေခမ်းခြောက်၊သစ်ပင်ပန်းမန် ကောက်ပဲသီးနှံတွေ ပျက်စီးကုန်တော့ တိုင်းသူပြည်သားတွေဟာ အင်မတန်ဒုက္ခရောက်ကြတာပေါ့။ ခွန်အားကြီးတဲ့ သူရဲကောင်း ဟို့ရိ က ပြည်သူတွေဆင်းရဲပင်ပန်းနေတာ မမြင်ရက်တာနဲ့ ခွန်းလွန်တောင်ထိပ်ကို တက်ပြီး ပိုနေတဲ့ နေ ၉ စင်းကို မျှားနဲ့ပစ်ချလိုက်တယ်တဲ့။ကျန်တဲ့ နေ ၁ စင်းကိုလည်း အချိန်မှန် နေဝင်နေထွက် လုပ်ဖို့ တာဝန်ပေးအပ်လိုက်တယ်တဲ့။
ဒီသတင်းကို ကြားတော့ အနောက်မယ်တော်က သူရဲကောင်းဟို့ရိ ကို မသေဆေးချီးမြှင့်လိုက်တယ်။ အဲဆေးကို သောက်လိုက်ရင် မအိုမသေတဲ့အပြင် ကောင်းကင်ပေါ်ကို ပျံတက်နိုင်ပြီး နတ်ဖြစ်သွားမယ်တဲ့။ ဟို့ရိမှာက အင်မတန်ချောမောလှပပြီး စိတ်ထားကောင်းတဲ့ ချန်အာ ဆိုတဲ့ဇနီးရှိတယ်။ ဟို့ရိက ချန်အာနဲ့မခွဲနိုင်တာကြောင့် ဆေးကိုမသောက်ဘဲ ဇနီးသည်ကို သေချာသိမ်းဆည်းခိုင်းထားလိုက်တယ်တဲ့။
ဟို့ရိရဲ့ နေ ၉ စင်းပစ်ချလိုက်တဲ့သတင်းကြောင့် ဟို့ရိဟာ လူများစွာရဲ့ ချစ်ခင်လေးစားမှုကို ခံရတဲ့အပြင် သူ့ဆီ တပည့်လာခံတဲ့ သူတွေလည်းအများကြီးပဲ့တဲ့။ ဒီထဲမှာ ဖန်မုန် ဆိုတဲ့လူတယောက်လည်း တပည့်လာခံသတဲ့။
တနေ့တော့ ဖန်မုန်က ဟို့ရိမှာ မသေဆေးရှိမှန်း သိသွားရော အဲဆေးကိုသူလိုချင်လာရော။ အဲတာနဲ့ ဟို့ရိကတပည့်တွေနဲ့ အမဲလိုက်သွားတဲ့ချိန်မှာ ဖန်မုန်က နေမကောင်းချင်ယောင်ဆောင်ပြီး ကျန်ခဲ့တာပေါ့လေ။ ဟို့ရိမရှိတဲ့ချိန် ဖန်မုန်က ချန်အာ ဆီသွားပြီး မသေဆေးတောင်းတာပေါ့။ ပြည်သူတွေကို သနားကြင်နာတတ်တဲ့ ချန်အာက လူဆိုးဖန်မုန်လက်ထဲ မသေဆေးရောက်သွားရင် လူတွေဒုက္ခရောက်မှာကို ကြိုမြင်ပြီး လုံးဝထုတ်မပေးဘူးတဲ့။ ဖန်မုန်က ဓါးကိုင်ပြီးချိန်းခြောက်တဲ့ခါမှာတော့ ချန်အာက အင်အားမမျှမှန်းသိတော့ ဆေးကို မျိုချလိုက်ပြီး ကောင်းကင်ပေါ်ကို ပျံတက်သွားသတဲ့။
ချန်အာကလည်း ဟို့ရိနဲ့ မခွဲနိုင်တာကြောင့် ကမ္ဘာမြေနဲ့အနီးဆုံးဖြစ်တဲ့ လပေါ်မှာ ပြန်လာနေသတဲ့။
ဟို့ရိအမဲလိုက်ရာက ပြန်လာတော့ ချန်အာကို မတွေ့တော့ "ချန်အာ ချန်အာ" နဲ့အော်ခေါ်ရှာတာပေါ့လေ။ အော်ရှာနေရင်းနဲ့ လကိုကြည့်မိသွားတဲ့ချိန်မှာ လပေါ်မှာ ယုန်တကောင်က ခုန်ဆွခုန်ဆွလုပ်နေတာရယ်၊သစ်ပင်တစ်ပင်ရယ်၊သူ့ဇနီးချန်အာကလည်း လပေါ်ကနေ သူ့ကိုပြန်ကြည့်နေတာကို မြင်သွားတယ်။ မြင်သွားတော့ အိမ်နောက်ဘက် ခြံထဲကနေ ချန်အာကြိုက်တတ်တဲ့ မုန့်တွေ ခင်းကျင်းပြီး ချန်အာကို သတိရလွမ်းဆွတ်ကြောင်းပြသတာပေါ့လေ။ ချန်အာကို ချစ်ခင်ကြတဲ့ လူတွေကလည်း ချန်အာကြိုက်တတ်တဲ့မုန့်တွေ၊အသီးတွေနဲ့ ပူဇော်ပြီး ကျန်းမာချမ်းသာစေကြောင်း ဆုတောင်းကြ၊ချန်အာကို အောက်မေ့ကြတာပေါ့လေ။ အဲကနေပြီးတော့ နှစ်စဉ် တရုတ်လ ၈ လပိုင်း ၁၅ ရက်နေ့ဟာ လမုန့်ပွဲတော်နေ့ဆိုပြီး ဖြစ်ပေါ်လာပါတယ်
လမုန့်ပွဲတော်နေ့မှာ တရုတ်လူမျိုးတွေဟာ မိသားစုပြန်လည်ဆုံစည်းကြပြီးတော့ အတူတကွ လကိုကြည့်ရှုခံစားပြီး စကားလေးတပြောပြောနဲ့ လမုန့်စားကြပါတယ် လမုန့်ရဲ့ အဝိုင်းပုံလေးဟာလည်း စည်းလုံးခြင်းကို ကိုယ်စားပြုပါသတဲ့ရှင့်
by goodycafe
