06/02/2025
❝ စိတ်စွမ်းအား မြင့်တက်အောင် ဘာတွေလုပ်မလဲ ❞
◾၁။ အတွေးလွန်တာ သက်သာဖို့ ချရေးပါ။
အများစုက စာရေးဖို့ပျင်းကြတယ်။ ဒီလောက်ပင်ပန်းနေတာကို ဘာရေးစရာလိုလို့လဲ၊ ဘာရမှာမလို့လဲ၊ အဲလိုထင်ကြတယ်။ ဟုတ်ပါတယ်၊ ကိုယ်ဖြစ်နေတာကို ချရေးတယ်ဆိုတာ ဘာမှမရပါဘူး။ ဒါပေမဲ့.. စိတ်သက်သာရာ ရသွားတယ်ဆိုတာကိုတော့ တော်ရုံလူ မသိကြဘူး။ မရေးဖူးလို့သာ မသိသေးတာလဲ ဖြစ်ကောင်းဖြစ်နိုင်တယ်။
◾၂။ ပင်ပန်းနေရင် ခဏအနားယူပါ။
တချို့ပြောကြတယ်၊ မဆုတ်မနစ် ကျားကုတ်ကျားခဲလုပ်ရင် ကြိုးစားရင် အောင်မြင်တယ်ဆိုတာတို့ ဘာတို့။ အမှန်က ကြိုးစားတိုင်း မအောင်မြင်နိုင်ဘူး။ နည်းမှန်လမ်းမှန် ကြိုးစားမှ အောင်မြင်တာ။ သစ်တုံးကို ဘရိတ်ဓားနဲ့သွားခွဲနေတယ်ဆိုတာမျိုးက ရူးရူးမိုက်မိုက်ကြိုးစားနေတာမျိုးပဲ၊ အလုပ်ချိန် အလုပ်လုပ်၊ မောရင် ခဏနား။ တရဆက်လုပ်ရင် ပိုဆိုးတယ်။
◾၃။ အာရုံနောက်သက်သာချင်ရင် ဖုန်းလျှော့သုံးပါ။
ဆိုရှယ်မီဒီယာ ခေတ်ကြီးဆိုတော့ လိုင်းပေါ်မှာ မြင်ရသမျှက စိတ်ညစ်စရာကြီးပဲ။ ဟိုသတင်းဒီအတင်း ဟိုပွဲဒီပွဲတွေ အရည်မရ အဖတ်မရတဲ့ ဆယ်လီအားပေးတာ စံနှုန်းလုပ်နေကြတာတွေ။ ဒီအခါ ဘာဖြစ်လာလဲဆိုတော့ အာရုံတွေ ထွေပြားလာတယ်၊ နောက်လာတယ်။ တစ်ချိန်လုံး.. လိုင်းပေါ်မှာပဲ Active ဖြစ်နေတယ်။ ဒါ့ကြောင့် သင်ယူလေ့လာမှုလုပ်ဖို့ပဲ အင်တာနက်သုံးပါ။
◾၄။ ဝမ်းနည်းတာ သက်သာချင်ရင် လေ့ကျင့်ခန်းလုပ်ပါ။
ခန္ဓာမှာ ရှိတဲ့ကြွက်သားတွေက လှုပ်ရှားမှုဖြစ်နေတယ်ဆိုရင် သွေးလည်ပတ်မှု အားကောင်းပြီး လူကိုလဲ အိပ်ပျော်စေတယ်။ အဲဒီထက် လေ့ကျင့်ခန်းလုပ်ခြင်းရဲ့ ကောင်းတဲ့အချက်က ဘာလဲဆိုရင် စိတ်ဖိစီးမှုတွေ၊ ဝမ်းနည်းတဲ့စိတ်တွေ သက်သာစေတယ်ဆိုတာပဲ။
◾၅။ စိတ်ဖီးစီးမှု သက်သာချင်ရင် လမ်းလျှောက်ပါ။
တစ်ရက် ခြေလှမ်းတစ်သောင်းပြည့်လို့ရှိရင် ပေါင်ချိန် ၀.၄ လောက်ကျစေသလို၊ စိတ်ဖိစီးတဲ့ဒဏ်ကိုလဲ ကာကွယ်ပေးပါတယ်လို့ သုတေသနတွေက ဖော်ပြပါတယ်။ ဒါ့ကြောင့် အထိုင်များနေရင် လမ်းများများလျှောက်ပေးပါ။ စိတ်ဖိစီးတာ သက်သာလာပါလိမ့်မယ်။
◾၆။ စိုးရိမ်ပူပန်မှု သက်သာဖို့ တရားထိုင်ပါ။
တရားထိုင်တာ ဘာသာရေးလုပ်တာမဟုတ်ပါဘူး။ တချို့က ဘာသာရေးနဲ့ ရောပစ်လိုက်ကြတယ်။ ဘာသာရေးနဲ့ ဆိုင်တဲ့အလုပ်ပေါ့။ အမှန်တကယ်တမ်း တရားထိုင်တယ်ဆိုတာ စိတ်ငြိမ်ဖို့၊ ကိုယ့်ကိုယ်ကိုယ် Focus ကောင်းနေဖို့ပါ။ တရားထိုင်ဖန်များလေလေ ဘယ်ဟာကို ဦးစားပေးရမလဲ၊ ဒါကို သိလေလေပဲ။
◾၇။ ဒေါသကြောင့် မပူလောင်ချင်ရင် သီချင်းနားထောင်ပါ။
နူးနူးရွရွလေးနဲ့ စိတ်ကို အေးဆေးလန်းတဲ့ သီချင်းတွေကို နားထောင်တဲ့အခါ ခံစားချက်ဟာ သီချင်းနဲ့အတူ ပါသွားတတ်တယ်။ စိတ်ကို ရသမြောက်စေမယ့် သံဇဉ်နဲ့ ကုသလို့ရှိရင် အပူဒေါသတွေ ငြိမ်းချမ်းတတ်တယ်။
◾၈။ စိတ်ပူလောင်တာ သက်သာချင်ရင် စာဖတ်ပါ။
ကိုယ့်ကိုယ်ကိုယ် ယုံကြည်မှု ပိုတိုးလာအောင်၊ လူကြားထဲ ပွဲလယ်တင့်အောင်၊ ဂနာမငြိမ်တဲ့စိတ်ကို အသိဉာဏ်ပညာနဲ့ ထိန်းချုပ်တတ်အောင် စာအုပ်စာပေတွေကပဲ ကူညီပေးနိုင်တာပါ။ ဒါ့ကြောင့် စာကို နေ့စဉ်လုပ်နေကျ နိစ္စဓူဝထဲမှာ အချိန်တစ်ခုထားပြီး စာဖတ်ပုံမှန်ဖတ်ပေးပါ။
#သင့်ဖုန်းထဲကဒစ်ဂျစ်တယ်စာကြည့်တိုက်
