29/03/2026
حاجات مفيش حد حيقولك عليهم غيري💜..
بنات وخاصة اللي يخدمو زيني ردو بالكم تهملو صحتكم لأنها حالياً أغلى شئ عندكم
1/لازم تاخذو ملتي فايتمنس لأن أحياناً مع كثرة ضغط ننسو ناكلو او حتى الشهية مسدودة وحتى لو كلينا حتكون ماكله عالسريع ..
فنفس الوقت نحافظو على نشاط الجسم ونقوو مناعتنا✅..
2/البسو أي حاجة مُريحة في رجليكم لما تخدمو راهو هاذي النقطه فرقت معاي هلبااااااا بذات أني أنسانه نعاني من ألام أسفل الظهر، الشئ هذا يقلل الضغط بين السطح والرجلين بذات مع كثرة الوقوف راهو الحاجة هاذي متستهينوش بيها فرقت معاي هلباا..
3/البسو قوانطي لما بتخدمو..وحده من الناس اللي لما تمس أميه سخونه ايديا فيسع ميجفو وأني خدمتي كلها فيها أماعين وشكلاطه تبي اميه ساخنه باش اذوب وتنظاف الحاجة+لو عندكم اكزيما او حساسيه من مواد التنظيف كله حتتفاديه بمجردك انك تلبسي قوانطي فقط..
4/أي حاجة تسهل عليكم الخدمه أشروها بدون تردد انتِ تستثمري في صحتك راهو مش في مشروعك بس..أي حاجة مهما كانت عجانة او كوشه او أي حاجة تقلل من تعبك أشروها🫶🏻..
5/خلي معاك ناس تانيه تخدم معاك خاصة في مواسم الخدمه..
أني نعمه من ربي أن وخياتي ومرت خوي جنبي ومنخلي فحد يمس معاي حاجة غيرهم هما أيديا الزوز حالياً ومنقدرش نخدم ولا طلبيه بدونهم..علمتهم الصنعة بحذافيرها وهما يهنو فيا ع كُل شئ❤️..
لأن لو بروحك حتاكليها في صحتك وتتأخري فالتسليم ويعني حتكوني حايسه في روحك وفي خدمتك ف نصيحتي خلو ناس فاهمة تعاونكم في خدمتكم وتعتمدو عليها✅❤️..
وكان عندكم حاجة تبو تفيدو بيها الناس خلوها فالتعليقان نستفيدو من بعض
وهاذي جلسه تصوير سريعه لحلوياتي الجميله ربي يباركلي 😍💜..
اللي وصل لنهايه البوست يحط لايك باش يوصل لأكبر عدد🫶🏻..
