08/09/2025
මම හිතන මම හදන විදිය ටම කේක් ගැන ලියවුන ලියවිල්ල ක් නිසා share කරන්න හිතුනා ❤
Makeup 💄 එකට කලින් 🤭
කාලෙකින් ඕඩර් එකක් බාරගත්තෙ...බෑ කියන්න බැරි ඕඩර් එකක්... අපේ නංගි කෙනෙක්ගෙ...500g කේක් එකක් මේක... ඒ උනත් කිලෝ එකේ කේක් එකක ප්රමාණයටම බඩු දාලා බැටර් එක හදලා ,,, ඒක ට්රේ 3කට බෙදලා තමයි දැම්මෙ...ඒ කියන්නෙ 500g ප්රමාණෙට අවශ්ය කරන කේක් බැටර් එක ට්රේ 2ට දාලා...ඉතුරු බැටර් එක වෙන ට්රේ එකකට දැම්මා...
පොඩි බැටර් එකක් හදනවට වඩා ඒක මට වාසියි..මොකද අනිත් කේක් එක ගෙදර අපිට කන්න පුලුවන් එතකොට...අනිවාර්යයෙන් පොඩි ඩබල මගෙන් ගේම ඉල්ලනවා නැතිනම්..😁
මං කේක් ඕඩර් භාරගන්න අදිමදි කරන හේතු කීපයක් තියෙනවා...
ප්රධානම දේ තමයි කේක් එකක මිල තීරණය කිරීම....
නම ගිය කම්පැනි වල හදන කේක් වගේ නෙමෙයි අපි ගෙදර කේක් හදනකොට පාවිච්චි කරන්නේ හොඳම බඩු...කිසිම දේකට ආදේශක පාවිච්චි කරන්නේ නෑ...ඒවගේම කල් ඉකුත් වීමෙ ද්රව්ය කිසිවක්ම පාවිච්චි කරන්නෙත් නෑ...රසකාරක සහ කෙමිකල් වර්ගත් නෑ..
ඉතින් එහෙම හදන කේක් ටිකක් මිලයි...ඇත්තම කිව්වොත් කඩවල් වල විකුණන්න තියෙන කේක් එක්ක බලනකොට ඊට වඩා දෙගුණයක මුදලක් ගෙදර හදන කේක් එකකට වියදම් වෙනවා...
ඉතින් කේක් එකකට යන මිල කිව්වහම සමහර මිනිස්සු උඩ යනවා...කේක් කන්න ආස උනාට මිල කිව්වහම බය වෙනවා....තැන් තැන්වල ගිහින් කතා වෙනවා...ඔය වගේ ප්රශ්න තියෙනවා...
එහෙමත් කෙනෙක් තමයි ඔය වෙනස හරියටම වටහාගෙන කීය ගියත් ගෙදර හදන කේක් එකක් මිලදී ගන්න දෙපාරක් හිතන්නෙ නැත්තෙ...
ඔය සමහර කුකුල් ෆාම් වලින් ඩැමේජ් වෙන බිත්තර අඩු මිලට අරගෙන කේක් හදන අයත් ඉන්නවා...ඒක මට දවසක් කඩේකින්ම කියපු දෙයක්..." ඩැමේජ් බිත්තර අඩුවට තියෙනවා කේක් හදන්න මේවා තමයි අරන් යන්නෙ කියලා " ඒ බිත්තරයක් රු.22-රු.25ක් අතර මුදලක් තමයි වෙන්නෙ...
ඉතිං මමනම් කවදාවත් ඩැමේජ් බිත්තර දාලා කේක් හදලා දීලත් නෑ...අඩුම තරමේ ගෙදර කන්නවත් ඩැමේජ් බිත්තර ගේන්නෙත් නෑ....
හේතුව ගැන පැහැදිලි කරන්න ඕනෙ නෑ..කවුරුත් ඔය ගැන දන්නවා ඇති...දන්නෙ නැතිනම් සර්ච් කරලා හොයලා බලන්න පොඩ්ඩක් ඩැමේජ් බිත්තර පාවිච්චි කරන එකේ බලපෑම...
මිනිස්සුන්ට දෙන කෑමක් බීමක් හදනකොට ඒ ගැන ගොඩාක් සැලකිලිමත් විය යුතු කරුණු තියෙනවා...බිස්නස් එකට ගෙදර කෑම හදන අය ඒ ගැන දන්නවා ඇති...
ඉතිං අනිත් කාරණේ තමයි සමහර බඩු හිටපු ගමන් අහස උසට ගණන් යනවා...
රසට කේක් එකක් හදනවනම් හොඳම දේවල් පාවිච්චි කරන්න ඕනෙ මටනම්...ආවට ගියාට අඩු මිලට බඩු අරන් කේක් හදලා මගෙ කේක් වල කොලිටි එක නැති කරගන්න කැමති නෑ මං....
සාමාන්යයෙන් කේක් බැටර් එකට මං පාවිච්චි කරන්නෙ ඇස්ට්රා හෝ මෙඩෝලි විතරයි...මීට වඩා මිලෙන් අඩු මාගරින් වර්ග ඕනෙ තරම් දැන් වෙළෙඳ පොලේ තියෙනවා...තිබුනට මං ඒවා පාවිච්චි කරන්නෙ නෑ..
හැබැයි කේක් එකක් අයිසින් කරනකොට ඇස්ට්රා/මෙඩෝලි වලින් අයිසින් කරාම කිසිම රසක් නෑ...ඒ නිසා අනිවාර්යයෙන් හයිලන්ඩ් බටර් තමයි පාවිච්චි කරන්නෙ..හයිලන්ඩ් නැතිනම් විතරක් කොත්මලේ බටර් එක පාවිච්චි කරනවා...එතකොට තමයි අයිසින් කේක් එකක නියම රස එන්නෙ...
ඒ වගේම චොකලට් කේක් එකක් හදනකොට මෝතා කොකෝ පවුඩර් එක තමයි දැනට මං පාවිච්චි කරලා තිබුන කොකෝ පවුඩර් වලින් මටනම් හොඳම...එක පාරක් මොකද්දෝ නමක් තියන ලූස් කෝකෝ පවුඩර් 500g ක් ගෙනාවා..ටිකක් ගානත් අඩුයි...ඔය කියන්නෙ මාදම්පෙ ඉද්දි කේක් කරනකොට...මාරවිල කඩේකින් ගෙනාවෙ..එයාලා හොඳයි කියලා දුන්නා..කේක් හදන අය මේක තමයි ගෙනියන්නේ කියලා..ඉතිං දෙපාරක් විතර කේක් හැදුවා...එතනින් එහාට ඒකෙන් ආයෙ කේක් හැදුවෙ නෑ..හදන්න හිතුනෙ නෑ...ඇයි කියලා අහන්න එපා...ඒ තරම් සෝක් කොකෝ පවුඩර් එකක් ඒක...කේක් එක රසාආආආඅයි 😂🤭 මොන ජරාවක්ද මන්දා... හිතාගත්තා පුරුදු දේ ගාන වැඩි උනත් කමක් නෑ නුපුරුදු ගණන් අඩු #%ද්දවල් ආයෙ ගන්නෙ නෑ කියලා...
ඉතිං නිකමට ඔයාලා කඩේකට ගිහාම බලන්න මෙන්න මේවගෙ ගණන් කොහොමද කියලා
සාමාන්යයෙන් කිලෝ එකේ කේක් එකකට මේ දේවල් ඕනෙ වෙන්නෙ
* ඇස්ට්රා / මෙඩෝලි 250g ( ලාබෙට තියන ඒවත් පොඩ්ඩක් බලන්න මිල ගණන් වල වෙනස )
* බිත්තර 4 / සීනි 250 / පිටි 250g
* වැනිලා
* පිටි කිරි පොඩි පැකට් ( මේස හැඳි 2,3ක් වගේ අල්ලන )
* තෙල් කඩදාසි
* මෝතා/ඩුම් ඩුම් අයිසින් ශුගර් 500g - 750g / හයිලන්ඩ් බටර් 200g
* චොකලට් කේක් නම්
* රිට්ස්බරි කුකින් චොකලට්
* මෝතා වගේ හොඳ බ්රෑන්ඩ් එකක කොකෝ පවුඩර්..
( හැම කොකෝ පවුඩර් එකක්ම නියම චොකලට් රස නෑ )
තව චොකලට් කේක් හදනකොට රහස් තියෙනවා..ඒවනම් මොනවද කියලා අහන්න ඔට්ටු නෑ හරිද 🤭
ඔන්න ඕවට අමතරව තව
* කරන්ට් බිල
* මහන්සිය
වගේ දේවලුත් එකතු උනාම කොච්චර ගානක් ගෙදර හදන කේක් එකකට යනවද කියලා නිකමට බලන්න...
මේ ටික මට කියන්නම හිතුනෙ ගොඩාක් අය ගෙදර හදන කේක් කේවල් කරලා කතා කරන නිසා...
හැමදාම බත් කනවා වගේ කේක් කන්නෙ නෑනෙ...ඉදලා හිටලා කනකොට රස කේක් එකක රස බලන්න කේවල් නොකර 😊
✍️
සුදු නෝනා's Tasty Food Collection
