12/06/2026
Stubbaflokkur -Föstudagur
Í hádegismat í gær var skyr ásamt brauði sem allir borðuðu vel af. Því næst var farið í ævintýraleikinn mikla sem vakti mikla gleði bæði meðal krakkanna og foringjanna. Í kaffi var brauð og kanilsnúðar og svo fór allur hópurinn í brennó. Næst tók við frjáls tími þar sem margir fóru í feluleik, léku sér í íþróttasalnum og gerðu sig fín fyrir veislukvöldið. Í veislumat var pizza og svo var farið í stoppdans og aðra hópleiki. Á veislukvöldvökunni var mikið sungið, foringjar sýndu hin víðfrægu leikrit og allir fengu ís. Eftir kvöldvöku var komið að háttatíma, en það var allt í plati því þá var komið að náttfatabíói með poppi og kósíheitum. Myndin sem horft var á var Að temja drekann sinn og öll fóru þau svo þreytt og glöð í háttinn eftir frábæran dag.
Í morgun var vakið kl 8:30 og farið beint í morgunmat. Á morgunstund var að sjálfsögðu sungið og krakkarnir fengu fræðslu um bænina. Þau heyrðu sögu um þakkarkörfuna og skrifuðu þakkir í sína eigin þakkarkörfu. Síðan var pakkað og leikið sér úti í bongó blíðunni. Í sólinni voru borðaðar pylsur, gerð vinaarmbönd og leikið sér í hrauninu. Síðasta ganga flokksins var upp á Sandfell sem var frábært í blíðunni.
Að lokum var komið að heimferð og krakkarnir fóru sælir heim eftir frábæran flokk.
Við forstöðukonurnar þökkum öllum fyrir flokkinn!
Karen og Svanhildur
Myndir https://www.flickr.com/gp/kfum-kfuk-island/niAUF9i7qz
