04/02/2026
其實每一樣野都有佢嘅限期📅
旦然接受是必然的
既然有限期，不如好好享受過程
係呢6年期間，每日都會做好每一個戚風蛋糕，注重每一個細節，務求將每一件成品都做到最好，呢過程係最好玩
老陳餅店對我黎講係一個遊樂場或者係一個實驗室，唔需要滿足任何人，只係想做自己想做的。Cream Cake 為例，由開舖第一日已經有人問有無Cream cake? 大家都知一個純蛋糕加左Cream 就可以賣貴2，300蚊，但我堅持唔做，因為純蛋糕係我開舖嘅初心，我只係尊重自己同對自己旦誠
可能好多人會覺得點解老陳唔加麻糬，唔加芋泥，唔加薄荷朱古力？ 我只係覺得呢個世界有好多可能性同埋唔喜歡隨波逐流，不過可能性好多時會被人誤會或質疑。
我好記得細個我同爸爸係客廳度食蟹，佢見到我唔係用佢方法剪開個蟹鉗，佢話咁樣緊係唔得啦！咁樣剪嘛！我都係想試下有無其他方法開到，話唔定會更好呢？ 我想講嘅就係，每一樣野都有佢嘅可能性，1個，2個甚至係1000個，無野係絕對。我由細到大都係一個充滿好奇心，每做一件事都會諗佢嘅可能性，可唔可行，反覆嘗試，從中學習，反覆思考，同做人一樣，做人嘅意義就係抱著好奇心，不斷思考，不斷體驗，享受過程。
6年時間話長唔長，話短唔短，長短都唔係重點，唔通做得長就係成功？短就係好失敗？係我心目中係無成功同失敗，雙方都只是人生其中一個過程，並不是人生終點，無謂將成功同失敗睇得太重，所以我係坦然接受。到最後問自己係呢6年得到d咩，我學到好多，思考左好多，享受好多，堅持最後，無隨波逐流，做左好多自己想做嘅食物比大家，同時被認同。
呢6年多謝大家，老陳要休息一下
經過5年元朗地舖，1年荃灣工場
，身心累了，要好好沉澱，繼續思考，再繼續出發。
我唔知將來會唔會仲有無老陳餅店，但老陳呢個名會繼續落去。如果將來我再開店，有人問我個名嘅時侯，我仍然都會講「我係老陳」
各位再見👋🏻
