04/08/2026
صباح الخير ❤️
دى اكتر وصفه اتطلبت منى بعد مانزلت وصفة الكب كيك اللى فاتت
كب كيك الفانيليا بالزيت وصفه اقتصاديه و خفيفه جدا و بتعمل كميه محترمه جدا ماشاءالله
المقدار سهل اوى بالزيت و مستحيل يفشل
اهم حاجه التزمى بالمقدار و الخطوات
4 بيضات و فانليا
كوب و نص سكر 300 جرام
كوب الا ربع زيت 150 جرام
كوب حليب او ميه أو اى عصير او سبرايت أو فانتا برتقان كمان تنفع 240 جرام
كل ده بتضرب فى الخلاط بتاع العصير او بالمضرب الكهرباء مش اقل اربع دقائق على اعلى سرعه
و تنخلى 350 حرام دقيق تلات كوبايات و باكو بيكنج بودر 16 جرام و رشه ملح
لما الخليط السائل يتضرب اصبيه فوق الدقيق و البينكج بودر و قلبى بمضرب سلك يدوى أو حتى معلقه يعنى بايدك مش بالمضرب الكهرباء
يتخبز على 180 بياخد 15_20 دقيقه
المقدار ده بيطلع 24 واحده الحجم العادى regular
تقدرى تجربى نص المقدار لو حابه أو ربعه كمان بيعمل 6 واحدت
مقدار 6 كب كيك :
بيضه
ربع كوب حليب
ربع كوب و معلقه كبيره سكر
خمس معالق كبيره زيت
كوب الا ربع دقيق
نص معلقه صغيره ممسوحه بيكنج بودر
فانليا طبعا و رشه ملح
الملحوظات :
_مش كل ورق الكب كيك اد بعضه حاولى تلاقى مقاس معقول تكون حروفه أعلى من صينيه ولو حاجه بسيطه افضل
_لو عايزاه يطلع عامل قبه كده املى تلات ارباع الكب
لو عايزاه فلات و متساوى للتزيين مثلا املى التلتين بس
اوعى ابدا never تملى الكب للاخر بالخليط Neverrrrrr
_ الكب كيك بيتعمل و يتفرزن لو عايزه بعد ما يبرد يتغلف كويس و يدخل الفريز يقدر يستمر اكتر من اسبوعين و بسحب منه على حسب الاحتياج يفك و هو متغلف لسه أو يدخل مايكرويبف دقيقه بيرجع زى الفريش بالظبط الكلام ده لأيام المدارس طبعا بيكون منجز جدا
_ممكن نضيف زبيب أو شوكليت شيبس بس بعد ما نحط الخليط فى الصينيه بحط اللى انا عايزاه عالوش وهو مش بينزل لتحت اوى مش بيعرف يعنى بيفضل ظاهر
_الفرن يكون ساخن مسبقا طبعا قبل ما احط فيه الكب كيك
_الورق و الصوانى عليهم عامل كبير جدا افضل حاجه الصوانى الومنيوم فاتحه علشان متحرقش الكب كيك من تحت
و الورق ميكونش خفيف اوى و نوع كويس اد ماتقدرى
يلا لاف ❤️ وشير 👏 و كومنت حلو زيك كده ينعنش يومى 🥰
و متنسيش تشوفى الوصفات السابقه على هاشتاج 👇
