01/06/2025
بوست مهم جدا 🥰👌
الصواني أو قوالب الكيك مش مجرد أدوات... دي مسألة "حياة أو موت" للكيكة!
خصوصًا لو بتعملي كيك إسفنجي. لأن حتى لو كل حاجة كانت مضبوطة – المقادير، التقليب، التسوية – واختارتي قالب غلط؟ النتيجة هتبقى فشل مضمون.
مش ببالغ، بس خامة القالب ومقاسه بيفرقوا فعلًا بشكل ضخم.
تعالي نرتبهم سوا:
1. الألومنيوم: ده الكينج!
بيوزع الحرارة كويس جدًا
بيسخن بسرعة وبيبرد بسرعة، وده معناه إنك بتحكمي في وقت السوا بدقة
كل المحترفين بيعتمدوا عليه، سواء كيكة، إسفنجي، كوكيز أو كب كيك
أهم شرط: يكون لونه فاتح ولامع زى الفضه ، و يكون تقيل (الخفيف بيحرق الكيك)، ومصر من أفضل دول العالم في إنتاجه! يعنى مش هتدورى كتير 😊
2. القوالب الغامقة (زي بريستيج – نيوفلام):
بتسخن بسرعة جدًا وبتبرد بسرعة جدًا
مش الأفضل للكيك اللي هيفضل وقت طويل في الفرن
مناسبة للكاب كيك، التشيز كيك (خاصة القالب اللي بيتفتح من الجنب)، أو كوكيز بشرط تحطي طبقتين ورق زبدة تحت.
3. التيفلون / المانع للالتصاق:
لا أنصح بيه للكيك
الحرارة فيه بتوصل ببطء
بتسبب قبة في النص (الهرم المشهور)
وبما إننا بنبطن القالب قبل الخبز، فمش بنحتاج الخاصية دي أصلاً.
4. البايركس:
ده للمكرونة والباستا بيك، مش الكيك
بيسخن ويبرد ببطء
بيخلي الكيك ناشفة ومكتومة
لو حجم القالب صغير، ممكن للبراونيز – بس مش الأفضل.
5. السيراميك:
مش مناسب للكيك إطلاقًا
الحرارة فيه بتتوزع ببطء
ممكن نستخدمه في حاجات زي الكريم بروليه أو السوفليه في المقاسات الصغيرة بس.
6. الاستانلس ستيل:
لا يُستخدم للكيك أبدًا
بيسخن بسرعة جدًا وبيحرق الكيك من بره ومن جوه مش مستوي... تجربة كوميدية بامتياز.
نيجي بقى للمقاس:
لازم تلتزمي بالمقاس المكتوب في الوصفة.
أي وصفة من غير مقاس قالب؟ تجاهليها
مافيش حاجة اسمها "صينية متوسطة"... المقاسات بالأرقام: ٢٠، ٢٤، ٢٦ سم، وهكذا.
لو الوصفة لمقاس ٢٠، ممكن تستخدمي ١٨ أو ٢٢ بدون مشاكل، لكن لا تروحي لـ١٥ أو ٢٨ وتستني نفس النتيجة
ماينفعش تضاعفي المقادير في نفس القالب علشان تعلى – ده بيبوظ القوام تمامًا
ولو العجين قليل على القالب؟ هتطلع الكيكة رفيعة، وساعتها وقت الخبز هيقل
دايمًا وقت الخبز = نسبة وتناسب بين كمية العجين والمقاس
تابعى الصفحه علشان مكملين فى سلسة الادوات المهمه
اعملي شير للمعلومة لو استفدتي... السرقة حرام!
